Era sostenibilitat a d’èster un des èishi centraus en desvolopament deth nòste territòri. Apostar per un Aran verd, resilient e comprometut damb eth miei ambient ei tanben apostar peth futur des nòsti joeni. Gràcies ar impuls deth govèrn d’UA en Conselh Generau d’Aran e ath finançament europèu obtengut a traués des hons Next Generation EU, aguesta vision se materialize damb projèctes concrèts coma era installacion de compostadors comunitaris enes escòles Sant Ròc de Bossòst e Garona de Vielha.
Eth compostatge escolar non sonque meilhore era gestion de residus organics enes centres educatius; tanben represente ua airina pedagogica fonamentau entà transméter valors de respècte ar entorn e cultura de sostenibilitat entre es mès joeni. Aguesta accion, introdusís un nau modèl d’aprendissatge a on er alumnat participe activaments en procès de separacion, transformacion e profitament des residus. Damb aguesta accion, se reafirme eth compromís damb era sostenibilitat e era transicion ecologica, en tot trabalhar amassa damb era Escòla Aranesa ena transmission des valors ambientaus.
Es compostadors plaçats son adaptats ar entorn escolar e permeten obtier compòst de nauta qualitat en pògui dies, en tot barrar eth cicle dera matèria organica laguens deth pròpri centre. En Vielha, inclús s’incorpòren es rèstes generades en minjador escolar, en tot mostrar ua apòsta clara pera economia circulara.
Cau remarcar qu’es residus organics mau gestionadi supausen un des principaus rèptes climatics deth present. Segontes era ONU, representen entre eth 8% e eth 10% des emissions globaus de gasi d’efècte ivernacle. A traués deth compostatge, redusim aguestes emissions, esvitam er emplec de fertilizants quimics e recuperam nutrients de naut valor entath solèr.
Comprenem que bastir un modèl de desvolopament respectuós damb er entorn comence pera educacion, e que sonque damb ua ciutadania formada e conscienta poderam afrontar es rèptes climatics deth present e deth futur. Apostam per politiques ambientaus ambicioses qu’intègren innovacion, pedagogia e compromís institucionau.
Trabalham entà qu’Aran sigue un exèmple de territòri sostenible, a on eth paisatge se soenhe des aules ençà a on cada accion compde ena luta contra eth cambi climatic. Aran, un territòri sostenible ambientau, economica e sociauments.
