Eth Conselh Generau d’Aran a aprobat per unanimitat ua modificacion des Normes Subsidiàries de planejament (NNSS), en vigor en sies municipis deth territòri, entà regular es emplecs e bastisses admisibles en solèr non urbanizable. Aguesta actualizacion normativa non sonque respón a problematiques detectades enes darrèri ans, se non que supause un pas en modèl d’organizacion territoriau qu’Aran vò liderar: net, ordenat, respetuós damb eth miei naturau e alinhat damb es estrategies europèes en matèria de sostenibilitat.
Era modificacion, permeterà compatibilizar eth respècte peth paisatge damb eth besonh d’adaptar es espacis ruraus as rèptes actuaus. Entre es principaus auanci, destaque era possibilitat de regular naues construccions restacades ara activitat agropecuària en parcèles de mès de 2.000 m², ua mesura especiuaments importanta entà apiejar ath sector pagés e facilitar eth relèu generacionau en aguest mestièr. Tanben s’introdusissen naui critèris entà esvitar era proliferacion de construccions improvisades e sense integracion paisatgistica, en tot fomentar en sòn lòc intervencions coerentes, armonizades e respetuoses damb er entorn.
Aguesta iniciativa forme part d’ua huelha de rota mès ampla: bastir un modèl de desvolopament territoriau basat ena sostenibilitat, era eficiéncia e eth compromís damb es generacions futures. En aguest sens, era norma tanben contemple aspèctes claus coma era gestion de movements de tèrres, era implantacion ordenada d’energies renovables (coma pannèus solars), e era creacion d’un ficha tecnica orientativa que facilitarà tant era tramitacion administrativa coma eth contraròtle e seguiment des actuacions.
En aguest marc, era recenta declaracion dera Val d’Aran coma Resèrva dera Biosfèra pera UNESCO, artenhuda en 2024, constitusís un reconeishement internacionau ar esfòrç collectiu deth territòri per preservar eth sòn entorn naturau, era sua cultura e es sues formes de vida tradicionaus. Aguesta naua norma assolide aguest compromís, en tot dotar as ajuntaments aranesi d’esturments juridics clars entà gestionar eth territòri de forma eficaça e sostenible.
Aguesta regulacion represente un cambi de paradigma ena manèra en qué suenham e planificam eth territòri. Se tracte de guardar ath futur damb responsabilitat, en tot respectar çò qu’èm e en tot apostar per un modèl de desvolopament que met era vida en centre: es persones, eth paisatge e era sostenibilitat.
Damb aguesta mesura, Aran auance ena consolidacion d’un modèl pròpri de gestion territoriau, que met en valor era sua singularitat, enfortís eth mon rurau e respón as rèptes globaus damb sollucions locaus, sostenibles e inclusives.
