Carlos Llobet Roviras, arquitècte de profession e militant d’Unitat d’Aran dençà era sua formacion. Tanben siguec membre fòrça actiu dera Associacion de Vesins “Es Terçons”, dera qué siguec dessenhador de toti es sòns pannèus e placards, prètzhèt que tanben portèc a tèrme posterioraments, en tot crear disparièrs pannèus electoraus.
Siguec escuelhut còsso der Ajuntament de Naut Aran per Unitat d’Aran enes prumères eleccions democratiques, en abriu deth 79.
Era sua estima ath país e era sua fidelitat ath partit, an estat un exèmple entè toti e totes es que formam part deth madeish. Es sues aportacions, tostemp plies de prudéncia, respècte e sabiesa, formen part deth patrimòni politic deth nòste partit.
En 2016 depausèc ua bona part deth sòn archiu particular, qu’ère format per diuèrsi projèctes de restauracion de quauques des bastisses mès emblematiques e importantes que formen part deth patrimòni arquitectonic aranés.
En aguest sens, cau remercar es projèctes de restauracion e conservacion dera glèisa de Sant Andreu de Salardú, era glèisa de Sant Pere d’Escunhau, era glèisa de Sant Joan d’Arties, e fòrça d’autes bastisses mès coma era Casa de Joan Chiquet de Vilamòs (ara ecomusèu).
Atau madeish, siguec er autor deth projècte de restauracion dera Casa deth Senhor d’Arròs, Sedença institucionau deth Conselh Generau d’Aran e emplaçament der Archiu Generau d’Aran. Bastissa d’estil neoclassic datada en 1820, e declarada Ben Culturau d’Interés Locau.
En un aute debais, en 1998, Carlos Llobet e era sua hemna Enriqueta Barés, autregèren e depositèren ar Archiu Generau d’Aran, eth hons familhar de Çò de Ramon Sans e de Solèr, de Garòs. Un hons format per ua sòrta de documentación datada deth 1566 a 1957, que compde damb 9 libres imprèssi e pergamins, e documents antics coma contractes, escritures, eca.
